Já. Það er allt svona helvíti frábært. Var að koma frá Essó þar sem við í 3.bekkjarráði ætluðum að afhenda klósettrúllur til 3.bekkjar, en nei að sjálfsögðu, þá kom sendingin af pappírnum ekki! Hún kemur á morgun, og glætan að fólk nenni að koma milli 10-12 að ná í þetta. Þá er bara mánudagurinn eftir, en hann átti bara að vera fyrir fólk sem yrði utanbæjar núna. Sé fyrir mér brjálaðan troðning á mánudaginn, upptjúnnað fólk að ná í klósettpappír. Hah, það væri skemmtileg sjón

Annars er bara allt á fullu núna. Skrýtið, mér finnst ég alltaf blogga þegar ég hef mest að gera, finn mér alltaf tíma til að gera eitthvað annað en ég á að gera.. Já. Svo tekur Capacent líka sinn tíma, en ég er símadama þar þrjú kvöld í viku. Nei þetta er ekki sóðaleg vinna, þetta er Gallup með nýtt nafn. Capacent-Gallup, þvílík fegurð. "Góða kvöldið, Ragnhildur heiti ég og er að hringja frá Gallup. Nafn þitt lenti í úrtaki í könnun sem við erum að gera, hefurðu tök á að svara henni núna?" Mmm, þessa setningu fæ ég að segja rohosalega oft. En þetta er samt ágætt, gæti verið í miklu verri vinnu. T.d. eins og þessari sem þú varst farinn að hugsa þegar þú last símadama.

Hann pabbi minn á afmæli í dag. 40 ára, það er ekki slæmur aldur. Hann er sko klárlega besti pabbi í heimi, sérstaklega eftir að hafa þolað mig og stelpurnar + Böðvar um seinustu helgi - í misjöfnu ástandi! Slægjuballið var nú aldeilis hresst. Shiiiit.. En jújú, þetta er nú bara einu sinni á ári þannig að þetta er í lagi. Maður lærir af reynslunni. Haha, já ég geri það nefnilega alltaf.

Ég get ekki beðið eftir að sjá Greys Anatomy 3.seríu. Það liggur við að ég telji niður dagana þangað til þeir byrja á Stöð2. Við Dagný vorum á youtube.com í gær að skoða klippur úr nýjustu seríunni og við misstum næstum vatnið við það. Ekki það að við séum óléttar, bara svona orðatiltæki, ef þú fattaðir það ekki. Mmmm Dr. McDreamy hann er sko pantið mitt. Dagnýjar pant er hommi.. úps

Spurning um að fara að lesa í Íslandsklukku áður en ég fer útað borða með mömmu, pabba og Val. Það er nú próf á mánudaginn, betra að vera búin að lesa bókina þá. Jón Hreggviðsson er náttúrulega eðalmaður!

Later
Hólmurinn fljúgandi

"Ég bara get ekki lifað lengur svona. Hún er alveg hætt að sjá um mig og lætur mig bara grotna niður án þess að bregðast neitt við.Ég er orðin upplituð, loðin og rykug. Ekki skrýtið þó að ég sé gangi ekki út. Mér finnst að ég eigi skilið að fara í gegnum þessar þjáningar sem láta mér líða betur eftir á, af því ég veit ekki hvernig fer fyrir mér ef það gerist ekki. Plís, geriði það fyrir mig að velja mig! Ég lofa að ég nýta þetta draumatækifæri sem best ef það gerist! Ég lofa að ég skal blogga oftar og segja Röggu að fara í rassgat ef hún sér ekki um mig almennilega!

Veljið mig, veljið mig!"

Sjitt, bloggsíðan mín fékk inn í Extreme Makeover fyrir þetta bréf. Hleypa þeir öllu inn eða?

En allavega, hún lítur nokkuð vel út svona yfirfarin og fín.

RaggaHólm

Klárlega lag mánaðarins, með dönsku ofurpopptekknóhljómsveitinni Infernal. Prófaðu að fara á www.infernal.dk. Brjálað góð síða.

Skoðaðu svo þetta:

http://video.google.com/videoplay?docid=-3815583800379404029&q=from+paris+to+berlin&hl=en
stórskemmtilegt myndband alveg hreint!

En já.. Slægjuball um næstu helgi. Allir að mæta, brjálað stuð á sveitaballi í Mývatnssveit.  Ég og mínar ætlum að minnsta kosti að mæta Dagný, áður en við förum heim þá verðum við búnar að redda þessu lagi á disk, ókei?

-Hólmurinn fljúgandi-

Ahh. Á morgun getur mér farið að líða vel aftur. Nei djók, ég meina á föstudaginn eftir 4.tíma getur mér farið að líða vel. Þá er þessi verkefnahrina, sem gengið hefur yfir mann hérna í skólanum, búin. Og þá erum við stelpurnar - eða partur af okkur - að fara til höfuðborgarinnar að sýna okkur og sjá aðra. Og já, Tinna losnar við teinana Markmiðið mitt (ókei næstum markmiðið mitt) er að finna mér árshátíðarkjól. Ekki seinna vænna að fara að byrja að leita.

Ég held að einmitt í tilefni af því að það er ömurlegt þessa dagana í skólanum, þá hafi byrjað að snjóa. Það kom snjór í gær. Ógeðslegt. Ég vil ekki svona lagað strax. Samt er þetta nú bara gott miðað við seinasta haust, því þá var kominn kafsnjór aðra helgina sem við vorum hérna. Ojbara.

Um daginn gerði ég eitt, nei ókei búin að gera það tvisvar núna þetta skólaárið, sem mér datt ekki í hug að ég ætti eftir að gera. Ég talaði uppi á sviði fyrir framan fulla Kvos í löngu. Öskraði svona nett yfir grey skinnin sem sátu í sakleysi sínu að nú væru til sölu skólapeysur. Í kjölfarið fylgdi hlátursroka frá Erni. Fyndinn gaur. En aldrei hefði mér dottið í hug að smá svona adrenalínsjokk fylgdi því að standa uppi á sviði og tala. En jú, ég fann svona nett fyrir því þegar ég steig niður af sviðinu, sérstaklega í seinna skiptið því ég var ein (nei ég meina, Eygló var þarna að týna skónum sínum, kúl hún). Þetta var rosalegt.

Flott Ragnhildur, lýstu þessu eins og þú hafir verið að syngja þjóðsönginn á úrslitaleik í handbolta.. Fífl.

Svo ég komi nú með fleiri Kvosarsögur, þá var útskriftarmyndband sýnt í löngu í gær. Ég fékk gæsahúð af spenningi, og ég er ekki að grínast. Það er bara ár í þetta, iss piss það er sko ekkert miðað við að maður er búinn að bíða eftir þessari ferð síðan í 1.bekk. Ég pissaði næstum á mig af spenningi.

En ég ætla að hætta þessu, enda á því að óska henni Aggý frænku til hamingju með daginn. Einu ári nær fölsku tönnunum og göngugrindinni

RaggaHólm

Arna vinkona var að tala um á blogginu sínu að hún væri haldin valkvíða. Ég er alveg sammála því, en ég er líka haldin öðrum kvíða sem er jafnvel stærri í sniðinu hjá mér en valkvíðinn. Það er égeraðmissaafeinhverju-kvíðinn. Hann hefur reyndar farið batnandi - held ég - en ég fæ ótrúlega oft á tilfinninguna að ég sé að missa af einhverju ef ég er að gera eitthvað sem er minna spennandi en annað sem ég veit að er í gangi. Ókei, kannski pínu flókið. Ef ég set þetta í eina stutta setningu, þá finnst mér ég alltaf vera að missa af einhverju.

Þessi sérstaki kvíði er alveg í hámarki núna. Palli ástin er að koma í Sjallann og ég kemst ekki af því ég þarf að vera heima með bróður mínum, því að elskulegir (lesist með kaldhæðni) foreldrar mínir eru í Eistlandi. Þeir sem þekkja mig vita vel að þegar Palli kemur, þá er hátíð hjá mér og núna er bara eins og ég sé að missa af jólunum. Í annað skiptið í röð, því ég komst ekki heldur seinast. Ég bara bíð eftir að það komi einhver töfralausn og ég komist, en innst inni er ég búin að sætta mig við þetta.

Ég held líka að dagarnir alveg fram að næstu helgi verði ömurlega leiðinlegir og eigi eftir að einkennast af verkefnum og leiðindum í skólanum og lífinu. En svo kemur næsta helgi og þá er eins gott að verði gaman, því við nokkrar vinkonurnar ætlum að fara suður. Vonandi að minnsta kosti.

Komið nóg af þessu kvörtunahorni í dag.

Skemmtið ykkur um helgina, ég veit að ég og Valur gerum það heima.

Rólm.